Concello de Ponteceso Diputación da Coruña

CONCELLO DE PONTECESO

RSS

Concello :: Novas

O Ciclo de Teatro de Ponteceso cumpre 25 anos con actuacións todos os sábados de novembro

Talía Teatro, Contraproducións e Os Náufragos pasarán con distintas propostas polo salón de actos do Edificio das Escolas


O teatro converterase no principal protagonista cultural do outono en Ponteceso. E non é para menos, porque no mes de novembro celebraremos a 25ª edición do Ciclo de Teatro Concello de Ponteceso, un dos eventos máis consolidados da localidade e cita obrigada para os/as amantes e afeccionados/as das artes escénicas. Para celebralo, o departamento de Cultura vén de elaborar unha programación especial, subvencionada pola Deputación da Coruña, con actuacións todos os sábados do mes e a visita dalgunhas das compañías máis importantes da nosa comunidade para promover así unha cultura teatral propia e fomentar o consumo de teatro feito en Galicia e en galego.

Nesta edición, as funcións darán comezo ás 22.30 horas no salón de actos do Edificio das Escolas, e as entradas custarán 3,06?.

O sábado 3, a compañía encargada de inaugurar o certame será Talía Teatro, gran coñecida do público pontecesán e asidua convidada ao festival. Nesta ocasión achegarannos unha revisión do clásico O servidor de dous amos, un dos textos inmortais da historia do teatro convertido no referente por excelencia da Commedia dell?Arte. Oito intérpretes desenvolverán un espectáculo onde todo será posible, a mentira e a confusión serán a base do xogo e os distintos espazos mudarán á vista do espectador para rir de todo e de todos, ata de nós mesmos. Un espectáculo trepidante e deslinguado, que resultará tan mordaz como divertido.

A segunda representación terá lugar o sábado 10 e correrá a cargo de Contraproducións, que nos presentará Os fillos do sol, unha elucubración teatral sobre a figura de Eduardo Pondal e a súa obsesión coa obra que centrou toda a súa vida como escritor: Os Eoas. Realidade ficcionada e fabulación dramática para amosar ao bardo pontecesán dos últimos tempos, octoxenario e neurótico, con dúbidas, medos e insatisfaccións creativas.

Da man da mesma agrupación teatral chegará o día 17 Commedia, unha peza que, ao igual que o noso certame, cumpre tamén 25 anos sobre os escenarios desde a súa estrea en 1993 na Mostra Internacional de Teatro de Ribadavia (MIT). Con máis de 200 funcións representadas en España, Portugal e Francia, este fito do teatro galego presenta unha sucesión de divertidos equívocos e enxeñosos enredos para falar do amor romántico e os riscos da sinceridade.

E, por último, a compañía coruñesa Os Náufragos porá, o sábado 24, o broche de ouro ao certame coa súa carta de presentación, Castrapo, unha proposta actual e próxima ao espectador que narra a viaxe ás orixes, ás raíces, falando do que fomos e xa non somos e do que somos e xa non seremos.

Con este cartel de luxo, desde o Departamento de Cultura convidamos a toda a cidadanía a asistir ao teatro e participar na gran festa cultural que temos organizada para o próximo mes, porque 25 nos non se celebran todos os días.

As persoas que estean interesadas en acudir non teñen máis que reservar as entradas na Tesourería do Concello e permanecer atentas ás sorpresas que temos preparadas. 3, 2, 1... arriba o pano!

Concello de Ponteceso