Os traxes de traballo do GES non se renovaban desde o ano 2014, polo que era unha actualización necesaria para poder levar a cabo as labores de mantemento e de apoio nos incendios de forma eficiente
Segundo indicou o alcalde, José Manuel Mato, “a idea é ir renovando os equipos de protección segundo o vaian necesitando os empregados deste servizo”
O Grupo de Emerxencias Supramunicipal do Concello de Ponteceso conta desde este mes cun novo equipo de protección para realizar o seu traballo de mantemento e apoio á extinción de incendios.
O alcalde, José Manuel Mato, e o concelleiro de Emerxencias, Juan Ramón Vida, recibiron o novo material para que os seus traballadores poidan levar a cabo as súas tarefas de forma óptima, coas condicións de seguridade axeitadas.
O investimento para adquirir este novo equipamento é de 17.968 euros, financiados na súa totalidade pola entidade local.
Os traxes de traballo do GES non se renovaban desde o ano 2014, polo que era unha actuación necesaria para poder levar a cabo os labores de mantemento e de apoio nos incendios de forma eficiente.
Segundo indicou o alcalde, José Manuel Mato, “a renovación destes traxes era unha actuación necesaria para garantir a seguridade dos traballadores do Grupo de Emerxencias” e engadiu que “a idea é ir renovando os equipos de protección segundo o vaian necesitando os empregados deste servizo”.
O rexedor subliñou que “esta é unha mostra máis do apoio do noso equipo de goberno ao grupo de emerxencias e ao seu importante labor, que día a día realizan intervencións en toda a comarca, sendo unhas das primeiras liñas de acción ante as intervencións de emerxencia”.
A intención deste proxecto é fomentar a separación e facilitar a reciclaxe
Esta acción conta cun orzamento total de 125.311 euros, dos cales o Concello de Ponteceso achega 38.846 euros
Pódese solicitar a adhesión ao programa a través da páxina web ponteceso.rsu.gal.
18 / 06 / 2024. O Concello de Ponteceso presentou no día de hoxe no salón de plenos da Casa do Concello o programa para a mellora de residuos a través da compostoxaxe e do uso do contedor marrón. No acto participaron o alcalde, José Manuel Mato, e técnicos de Premae, a empresa encargada do proxecto.
Un dos principais eixos desta nova campaña será o de apostar pola autoxestión da materia orgánica, fomentando a compostaxe doméstica. Por outra banda, engadirase un novo contedor aos xa existentes na rúa, o contedor marrón, dedicado exclusivamente aos residuos orgánicos.
Estes novos elementos urbanos contarán cunha peculiaridade, pois presentarán una fechadura pola que os veciños e as veciñas que queiran participar nesta iniciativa deberán solicitar a súa tarxeta identificativa para poder depositar os seus residuos. A idea é fomentar a separación, facilitando a reciclaxe.
Nesta nova campaña adquiren especial relevancia os grandes produtores de residuos orgánicos, como son os restaurantes, que recibirán, de balde, asesoramento e medios para levar a cabo esta nova iniciativa. Realizaranse tamén formacións nos centros de ensino, a fin de educar á poboación desde idades temperás.
Outro dos obxectivos deste proxecto é que os técnicos se despracen polas parroquias do municipio para que esta idea chegue a todos os recunchos de Ponteceso, desde o núcleo urbano ata as zonas máis rurais.
Para levar a cabo este novo proxecto, o Concello de Ponteceso contará con 135 composteiros, que se repartirán entre a veciñanza, e 70 contedores marróns, que se colocarán nos puntos determinados polos técnicos municipais.
Tamén inclúe un camión 100% eléctrico para a recollida de biorresiduos, destacando as vantaxes deste tipo de vehículos, como a redución de emisións, a diminución da contaminación acústica e o seu posterior tratamento.
Esta acción conta cun orzamento total de 125.311 euros, dos cales o Concello de Ponteceso achega 38.846 euros.
Segundo indicou o alcalde de Ponteceso, José Manuel Mato, “a idea é concienciar e sensibilizar á veciñanza á hora de reducir o lixo, por iso é importante a posta en funcionamento dos composteiros, que sacan de circulación unha gran cantidade de residuos”.
“Ata este ano cada tonelada depositada no contedor verde tiña un custo de 65 euros, por 35 euros do marrón, que se repercutirá nas taxas pagadas pola veciñanza, así que é importante rebaixar o uso do contedor verde en favor do marrón” concluíu.
Solicitude de composteiros
O Concello de Ponteceso habilitou a web ponteceso.rsu.gal para inscribirse no programa e solicitar un composteiro. Dentro dunhas semanas formalizarase unha reunión entre todos os solicitantes para entregar os materiais, informar sobre o seu uso e resolver as dúbidas pertinentes.
Pódese solicitar máis información sobre o programa a través do número de teléfono ou de whatsapp 647 521 464, ou ben a través do correo electrónico residuos@ponteceso.net